Jensina, Høgni og Kári kappaðust í finaluni í singer/songwriter kappingini leygardagin.
Sera nógv fólk vóru møtt í Hafnia Lounge. Tað var um at sild í tunnu í trongu hølunum. Tú skuldi vera í góðari tíð til at fáa eitt hampiligt pláss, og tíbetur var undirritaði í sera góðari tíð.
Jensina Olsen, Høgni Reistrup og Kári Páll Nolsøe vóru komin í finaluna umvegis nøkur undanumfør í singer/songwriter kappingini 2006. Spenningurin var stórur frammanundan um, hvør fór at vinna. Støðið var eisini sera høgt, og øll trý høvdu verið verdir vinnarar.
Tónleikurin er í hásæti í hugnaliga umhvørvinum í Hafnia Lounge. Framførslan gerst á ein serligan hátt sera persónlig. Sangararnir verða noyddir til at samskifta við fólkini á einum andlit-til-andlit støði. Gittarin og lítla anleggið kann skjótt fáa ein at kenna, at framførslan er nakað nakin. Men hetta virkar eisini til, at styrkirnar hjá sangarunum koma betri fram. Tú hoyrir hvønn staklut í fingraspælinum og vokalini. Fyri summi er hetta ein fyrimunur, meðan tað er ein vansi fyri onnur.
Tiltakið byrjaði klokkan 22. Vinnarin fær tveir upptøkudagar afturat heiðrinum at gerast partur av fína selskapinum av singer/songwriter vinnarum. So tað stóð okkurt uppá spæl leygarkvøldið.
VInnarin Jensina Olsen trokaði Finn Jensen og Kjartan Hansen til síðis í undanumfarinum og ognaði sær ein sess í finaluni. Teir báðir eru royndir og vælumtóktir innan undirhaldsvinnuna, so hetta var ikki ein og hvør.
Jensina var tó ikki imponerað. Hon varð av nógvum mett at vera favorittur til heiðurin. Hon hevur av sonnum verður kanin, sum er komin úr hattinum í ár.
Kári Páll Nolsøe
Fyrstur á pallinum var Kári Páll Nolsøe. Hann var sera avslappaður í stíli, og hetta dámdi fólki væl. Kári hevur eina hása dreingjarødd, sum riggar væl til sangirnar, sum hann syngur. Sangirnir eru friðarligir kærleikssangir. Tekstirnir eru inniligir og intimir, men onkur sangur hevur eisini eitt vet av skemti í.
Størsta styrkin hjá Kára er helst røddin. Hann hevur eina sera kula ráa rødd, men hann syngur samstundis sera reint og vakurt, tá ið hann fer upp í teir høgu tónarnar. Røddin hóskar væl til tekstirnar, sum mangan eru sera droymandi.
"Eg elski, tá ið Kári syngur", segði ein kvinna aftanfyri meg. Tað er einki løgið í tí. Hann hevur kanska flottastu røddina av teimum trimum, sum framførdu hetta kvøldið.
Ljóðblandingin hetta kvøldið var sera væl úr hondum greitt. Hetta hjálpti eisini Kára væl.
Um eg skal seta fingrarnar á okkurt, haldi eg, at sangirnir vóru eitt sindur einstáttaðir. Framførslan hjá Kára var bara ikki so spennandi sum hinar báðar. Men tað sigur kortini meira um Jensinu og Høgna, enn tað sigur um Kára. Tey vóru øll trý framúrskarandi hetta kvøldið.
Høgni Reistrup
Høgni Reistrup er serliga kendur frá GBOB-vinnarunum Deja-Vu. Hann hevur verið við í kappingini í 2003, har ið hann eisini var í finaluni uttan at vinna. Eingin ivi er um, at Høgni er ein sera evnaríkur ungur maður, sum hevur mangar streingir at spæla uppá.
Eyðkent fyri framførsluna hjá Høgna var hansara fína fingraspæl. Hann spælir mangan við ólogiskum akkordum og torførum tempo. Hann megnaði tó væl at halda træðrirnar saman.
Høgni hevur eina fína pena rødd. Hon er rættiliga veik, men hann dugir væl at nýta hana. Løgini eru friðarlig og meladiskar balladur. Teksturin er poetiskur og minnir um yrkingar.
Serliga síðsti sangurin hjá Høgna "Tak meg við" fangaði oyrað. Har spældi Høgni munnharpu og gittara samstundis. Hetta prógvar eisini, hvussu evnaríkur hann er, og hvussu fjølbroytt evnini eru. Fólk nikkaðu til hendan sangin, sum var eitt sindur lívligari enn hinir.
Síðsta lagið var eitt veruligt klimaks í framførsluni hjá Høgna. Lógvabrestirnir vóru øgiligir, og nógv hava uttan iva hugsað: "hetta er vinnarin".
Jensina Olsen
Til seinast kom Jensina Olsen á pallin. Tað hoyrdist, at hon er sera væl umtókt millum fólk. fetir lógvabrestunum at døma, var hon publikumsfavoritturin hetta kvøldið.
Jensina livdi eisini upp til vónirnar. Fyrsti sangurin var ein kærleikssangur. Hon hevur eisini sera kraftmikla vakra rødd, sum tó eisini meistrar teimum vøkru høgu tónunum. Næsti sangur var um sorg og sakn. Hon livir seg sera væl inn í tað, sum hon syngur. Tað er samsvar millum tekstin og huglagið í lagnum. Jensina sang melankolskt og gandakent. Hon minti um eitt álvafljóð, sum syrgdi um sín mista kærleika. Flott lag, sum veruliga klingaði í oyrunum. Aftur her havi eg hug at nevna, at ljóðblandingin var framúr góð.
Síðsti sangurin var á enskum. Teksturin var skemtiligur, og lagið var meira lívligt enn hini bæði. Hon hevði nøkur "breaks", sum veruliga sótu væl. Í hesum lagnum vísti hon veruliga, hvussu gott tamarhald, hon hevur á røddini, tá ið hon skreiðaði oman og niðan gjøgnum oktavirnar. Hon endaði við einum flottum "fade-away".
Jensina var ein verdur vinnari hetta kvøldið. Støðið í finaluni var sera høgt, og tað var ein góð tónleikauppliving hjá áhoyrarunum.
