Jenis avlýsir blokk-hækking

Eitt av aðalmálunum hjá sam­gonguni var at hækka blokkstuðulin úr Danmark við 130 til 200 milliónum krón­um. Serliga var tað Sam­bands­flokkurin, sum koyrdi hart upp á hetta málið til løgtingsvalið – og løg­maður setti longu gongd á málið, áðrenn sam­gong­an endaliga varð skip­að, við at senda boð­ini til Bjarna Corydon, fíggj­ar­mál­a­ráð­harra danska.
Tað kom kortini ikki tað stóra burtur úr hesum sam­ráð­ingu­m. Coyrdon segði longu undir viðgerðini av fólka­tings­fíggj­ar­lóg­ini, at tal­an ikki undir nøkrum um­støð­um fór at verða um at hækka blokkin – men møgu­liga kundi tosast um at prís­tals­viðgera blokkin. Og tað varð gjørt, blokkurin vaks tískil við 8,6 milliónum krón­um.
Men sambært skrivinum frá Jenis av Rana í nátt, so verða als ongar samráðingar aftur, so sum løgmaður ann­ars hev­ur boðað frá.
Fráboðanin hjá Jenisi er so­ljóðandi:
»…samráðingarnar við donsku stjórnina um dag­førda rík­is­veiting hava verið og verð­a ikki endurtiknar!
Tvær ásetingar vóru í sam­gong­u­skjal­i­num við­víkj­andi rík­is­veit­ing­ini. Hin fyrra, um sam­ráð­ing­ar við donsku stjórn­ina um at dag­føra rík­is­veit­ing­ina til dags­virði, varð eftir ynski sam­band­s­ins (hetta var áðr­enn nýggju tónar teirra á ríkisrættarliga øk­i­num). Hin seinna var at mót­rokna økingina við 15% av van­ligu meirinntøkum land­s­kassans.
Løgmaður og fíggj­ar­mál­ar­áð­h­arrin komu aftur av sam­ráði­ngar­ferð í Danmark sum av torv­heiðum. Eftir heim­komuna høvdu vit fýra floks­for­menn í sam­gong­u­flokk­u­num fund um støð­una. Á fundinum var, til gleði fyri mong, full semja um at taka úrslitið til eft­ir­tekt­ar og ikki at fara aftur til sam­ráð­ing­ar, hvørki tá ella seinni. Tað sum eftir stend­ur er seinna ásetingin í sam­g­ong­u­skjal­i­num, mót­rokn­ing­in, og skuldu ikki verið mong bein í at fullført hana.«