Myndugleikarnir í Japan siga nú, at vanlukkan á Fukushima-kjarnorkuverkinum er so mikið álvarssom, at teir hava gjørt av at flokka hana á sama stigi sum Tjernobyl-vanlukkan. Tað vil siga, at teir meta vanlukkuna at vera munandi verri, enn teir hava gjørt higartil.
Avgerðin at økja tilbúgvingina er tikin við støði í tí geislavirkni, sum er staðfest nærhendis Fukushima-verkinum, sum fór illa av flóðalduni tann 11. mars.
Myndugleikarnir gera tó vart við, at tað geislavirkna útlátið á Fukushima-verkinum er bara 10 prosent av tí útlátinum, sum var í Tjernobyl. Ein talsmaður fyri myndugleikarnar sigur, at tær báðar vanlukkurnar kunnu heldur ikki samanberast. Í Tjernobyl sprongdust reatkorarnir. Í Fukushima eru teir heilir, sigur hann.
