Jólini munnu vera tann hátíðin í kirkjuárinum, sum savnar mest fólk. Øll royna eftir førimuni at gera tað so hugnaligt sum yvirhøvur gjørligt. Haraftrat verða fólk so sera gávumild, prýða við ymiskum jólaprýði og serliga jólaperurnar í ymiskum litum, sum seta sín serliga dám á, bæði innan- og uttandura.
Alt hetta ger, at vit verða í serligum jólahýri. Men hvussu er við Jesus-barninum? Verður tað fjónað í øllum jólastákinum? Hetta er tann stóri og brennandi spurningurin.
Gud sendi jú Sonin í heimin fyri at frelsa okkum syndarar sum vóru rikin úr Edens aldingarði við syndafallinum, hin dapra dagin á sinni. Hetta má verða tað sum er altavgerandi við jólahaldum okkara. Hetta má hvør einstakur kanna hjá sær sjálvum, sum tað stendur skrivað: “Kanna meg, Guð, og kenn mítt hjarta, rannsaka meg og kenn mína hugsan! Vita, um eg gangi á glatunarvegi og leið meg hin æviga vegin!” (Sálmur 139,24-25).
So fari eg at ynskja øllum Føroya fólki eini gleðilig jól og eitt av Harranum signað nýggjár í Jesu navni, við tøkk fyri árið sum skjótt er útrunnið.
fyri seg
Jólasálmur
yrktur til jólini 2010
(Lag: Nú ringja klokkur)
Eitt barn er føtt í Dávids stað,
tí eru øll so glað í dag;
tí Jesus Kristus føddur er,
tey tíðindi ein eingil ber.
Tað sótu hirðar seyðum hjá,
tá boðar eingil teimum frá;
ein frelsari nú føddur er,
hann, sum alheimsins syndir ber.
Ein stjørna lýsti fjósi á,
har Jesus-barnið sæla lá;
tá sungu einglar jólalag,
um hann ið mannabørn ger glað.
Í dag vit halda kristin jól,
nú Jesus er vár náðarsól;
hann føddur var til pínslu, deyð,
og bjargar oss úr synd og neyð.
Kom haldi andi, ver oss hjá,
so frelsu sína vit øll sjá;
sum ætlað er til hvørja tjóð,
tí syngja vit øll glað og fró.
Vár jólagestur, Jesus, ver,
so øll tín sæla sáttargerð;
sum fram var har á Golgata,
tí syngja vit halleluja.
Kjartan Stakksund
mynd
SPURNINGUR
- Hvussu er við Jesus-barninum? Verður tað fjónað í øllum jólastákinum? Hetta er tann stóri og brennandi spurningurin, sigur Kjartan Stakksund av Eiði
