Leiðarin fyri mið-vinstra samgonguni í Italia, Pier Luigi Bersani, hevur givið upp í royndunum at skipa nýggja stjórn í Italia.
Eg havi sagt forsetanum, at eg ikki dugi at finna nakra loysn, ið kann enda við eini nýggjari stjórn, segði Bersani, eftir at hann í dag hevði havt samrøður við forsetan, Giorgio Napolitano.
Italska tjóðartingsvalið fyri einum góðum mánaði síðani gjørdi ikki politisku støðuna í landinum greiðari, tí eingin fekk nóg stóran meiriluta og eingir samstarvsmøguleikar eru í eygsjón.
Forsetin fer nú at lodda dýpið hjá teimum ymsum politisku leiðarunum, og síðani tekur hann støðu til, hvat næsta stigið verður. Í ringasta føri kann tað enda við nývali.
