Aftaná pínligu støðuna, har íslendsku dómararnir Jónas Elíasson og Anton Gylfi Pálsson ikki sóu støðuna, har suðurkoreanska kvinnulandsliðið í hondbólti fekk eitt mál kolldømt, sum tær av røttum átti ímóti fronsku hondbóltskvinnunum, eru íslendsku dómararnir og danski eygleiðarin Bjarne Munk Hansen sendir heim av altjóða hondbóltssamgonguni IHF, og hava teir triggir fingið at vita, at teir sleppa ikki at døma til eitt HM-endaspæl í hondbólti aftur.
Íslendska hondbóltsdómarafelagið mótmælir harðliga viðferðina Jónas Elíasson og Anton Gylfi álsson hava fingið. Guðjón L. Sigurðsson, formaður í íslendska hondbóltsdómarafelagnum heldur, at viðferðin hjá IHF av Jónasi Elíassyni og Antoni Gylfa Pálssyni er skammilig. - Vit mótmæla harðliga viðferðini íslendsku dómararnir hava fingið, og vit vilja hava evropeisku hondbóltssamgonguna, EHF at taka málið upp. Jónas Elíasson og Anton Gylfi Pálsson fingu onga frágreiðing frá IHF, men frættu gjøgnum netmiðlarnir, at teir eru bannaðir frá at døma HM-endaspæls dystir í allari framtíð. Hetta er ein avgerð forsetin í IHF, Hassan Moustafa einsamallur hevur tikið. Vit í dómarafelagnum hava tað, sum okkara fremstu raðfesting, at framtíðin hjá íslendsku hondbóltsdómarunum ikki verður oyðiløgd, sigur Guðjón L. Sigurðsson við íslendska kringvarpið, RÚV.
