Føroyar eru í andgletti aftur uttanlands. Eftir bankamálið og drúgvu umrøðuna av henni í fjølmiðlunum, eru tað nú onnur mál ið troka á. Føroyska Viðskiftastovan í Keypmannahavn hevur merkt ein vaksandi áhuga seinasta árið millum danir og aðrar útlendingar fyri føroyskum viðurskiftum. Talan er serliga um fjølmiðlar, sendistovur og universitetsfólk, sum ynskja kunning. Síðani síðsta vár hava fyrispurningarnir serstakliga snúð seg um framtíðar støðu Føroya í ríkisfelagsskapinum, og útlitini fyri eini møguligari føroyskari oljuvinnu.
- Síðani bankamálið varð avgreitt, hevur støða Føroya í ríkisfelagsskapinum havt størstan áhuga millum fólk, ið vilja vita meiri um Føroyar. Tað kemst sjálvandi av, at landsstýrið eftir seinasta val kunngjørdi, at tað fór at arbeiða fyri einum sjálvstøðugum Føroyum. Vit hava sent eina rúgvu av upplýsingartilfari út, har sjónarmiðini hjá landsstýrinum og andstøðuni eru við, sigur Trygvi Johansen, leiðari á Føroysku Viðskiftastovuni í Keypmannahavn.
Í nógv ár hevur danska Uttanríkisráðið saman við Viðskiftastovuni skipað fyri sendiráðharravitjan til Føroya. Talan er um útlendskar sendiráðharrar í Danmark, og áhugin at koma til Føroya í summar, hevur ongantíð verið so stórur sum í ár.
- Hetta er tekin um, at Føroyar og føroysk áhugamál eru í fokus í løtuni, sigur Trygvi Johansen.
Vitjanin verður frá síðst í august til eina viku inn í september.
Komið fyri at verða
Í síðstu viku skipaði Føroya Landsstýri saman við Føroysku Viðskiftastovuni í Keypmannahavn fyri móttøku og kunning. - Endamálið við framtakinum var at kunna útlendingar um, at viðurskiftini í Føroyum eru við at koma í rætt lag aftur eftir djúpu kreppuna, og at vit nú hyggja frameftir. Løgmaður tosaði um politisku støðuna, vinnulív, framtíðina og annað, meðan landsstýrismaðurin í sjálvstýrismálum greiddi frá ætlanum landsstýrisins viðvíkjandi framtíðar ríkisrættarligu støðu okkara.
- Vit fingu ongar beinleiðis afturmeldingar frá gestunum, men tá ið tú tosar við hesi fólkini, er tað greitt, at tey ivast í, um eitt so lítið og avbyrgt land sum Føroyar fer at klára seg sjálvt, sigur Trygvi Johansen.
Á móttøkuni vóru eini 120 fólk, embætisfólk, politikarar, ráðharrar, útlendskir sendiharrar í Danmark, fjølmiðlar og onnur. - Tiltakið eydnaðist væl og allir partar vóru væl nøgdir. Tiltakið verður endurtikið umleið eina ferð um árið, ella tá ið vit hava ein serligan boðskap at vera fram.
