Ein føroyingalið var í dag í eldinum í næstbestu donsku hondbóltsdeildini hjá monnum.
Í Jyllinge-høllini tóku Pauli Jacobsen, Rói Berg Hansen og liðfelagarnir í HØJ móti Odder.
Tað eydnaðist HØJ at vinna ein tepran 31-29 sigur. Odder skoraði til 30-29 tá 20 sekund vóru eftir, men tað eydnaðist Simen Schønningsen at skora til 31-29 tá bert fimm sekund vóru eftir av dystinum, og so var sigurin í hús.
Í steðginum var Odder á odda 16-15. Hetta er fjórði sigurin á rað hjá HØJ.
HØJ er nummar trý í deildini við 28 stigum. Trý stig eru upp til oddaliðið, Midtjylland sum hevur 31 stig.
Komandi mikukvøld klokkan 19 verður toppuppgerð í Jyllinge-høllini. Tá tekur HØJ móti Grindsted, ið er næstfremst í deildini við 29 stigum.
Grindsted skal tó fyrst spæla móti liðnum hjá Teis Horn Rasmussen og Peter Krogh, Aarhus HC á útivølli klokkan 16.30 í morgin.
