Landsstýriskvinnan í heilsu- og innlendismálum, Sirið Stenberg, hevur gjørt av at seta Thomas Schiøler sum læknafakligan varastjóra fyri Sjúkrahúsverk Føroya.
Thomas Schiøler er 58 ára gamal og serlækni í klinisk biokemi. Hann hevur OLAU I-III leiðsluútbúgving frá Lægeforeningen umframt diplomútbúgving í leiðslu.
Thomas Schiøler hevur drúgvar læjnaligar royndir, eisini sum yvirlækni og leiðandi yvirlækni á donskum sjúkrahúsum.
Harafturat hevur Thomas Schiøler drúgvar royndir sum seniorgranskari á DSI, sum sekretariatschef í danska Heilsustýrinum og sum yvirlækni í danska Heilsustýrinum.
Nýggi varastjórin við læknafakligari bakgrund tekur við starvinum tann 1. desember 2018.
