Hesar næstu mánaðirnar verða tríggar fiskivinnustevnur á Kambsdali og í Havn, har møguleikar og avbjóðingarnar hjá føroysku fiskivinnuni verða lýstar. Tað er Óli Samró á Farec, sum skipar fyri.
- Føroyska fiskivinnan er komin á eitt vegamót og stundin er komin til at seta kikaran á, hvat hendir úti í heimi, og hvussu fiskivinnan verður lagað til veruleikan, staðfestir hann.
Men hann staðfestir samstundis, at møguleikarnir hava ongantíð verið betri enn nú, tí eftirspurningurin eftir fiski er stórur ? og vaksandi- og prísurin er góður.
Men samstundis er tað ein veruleiki, at marknaðurin er farin at seta nýggj krøv til
feskleika, merking og burðardygd.
Men samstundis verða nýggir møguleikar bjóðaðir fram, ið lata marknaðirnar upp á ein annan hátt.
- Við fleiri og fleiri handilsavtalum gerst heimshandilin smidligari. Nýggir kappingingarneytar eru seinnu árini komnir í láglønarlondum í Asia og Eysturevropa.
- Onki sum fyrr, tí alt er broytt, sigur Óli Samró.
Spurningurin er bara, hvussu vit fáa sum mest burtur úr hesi einastandandi støðu, sum Føroyar eru í mitt í Atlantshavi.
Tað er hetta, sum er grundarlagið undir teimum trimum stevnunum á Kambsdali og í Havn hesa næstu tíðina.
Á hvørjum av teimum trimum stevnunum, sum verða seinnapartarnar í døgunum 12. januar, 15. mars og 13. apríl, verða serlig evni viðgjørd
Men lyklaorðið er vitan, staðfestir fyrireikarin eisini.
Stevnurnar eru ætlaðar reiðarum, virkjum, fíggingarstovnum, flutningsfeløgum, tænastuveitarum, fakfeløgum og politiska myndugleikanum.
