Eftir summarsteðg síðani fríggjakvøldið 27. juni er fótbóltur í bestu deildini aftur á skránni. Tveir dystir í 16. umfari eru á skránni í dag. Ein verður spældur í morgin, og ein verður spældur týsdagin.
Síðani landskappingin fór í summarfrí hava fýra feløg kappast í europeisku kappingunum. Víkingur er framvegis við í Europa liguni, og tað ber við sær, at fimti dysturin í 16. umfari í landskappingini ikki verður spældur mikukvøldið soleiðis, sum tað annars var ætlað. Av góðum grundum ber ikki til enn at siga, nær dysturin í Runavík millum NSÍ og Víking verður spældur.
Tríggir dystir verða spældir í høvuðsstaðnum á ólavsøku. Tann fyrsti er longu í dag, tá ið AB fær vitjan av EB/Streymi. Í morgin, ólavsøkuaftan, fær HB vitjan av B68, og ólavsøkudag fær B36 vitjan av KÍ.
Fjórði dysturin hesa ferð verður spældur í Fuglafirði, har ÍF í dag fær vitjan av Skála.
Líkindini at spæla fótbólt eru av teimum fagrastu. Hann er høgur í ættini, lotið er millum lítið og einki, hitin er longu komin upp á 14 stig nógva staðni, tað er turt, og sólin hevur hug at kaga undan.
Í dag
ÍF-Skála: Páll Augustinussen kl. 15.00
AB-EB/Streymur: Alex Troleis kl. 15.00
Í morgin - ólavsøkuaftan
HB-B68: Petur Reinert kl. 18.00
Týsdagin – ólavsøkudag
B36-KÍ: Dagfinn Forná kl. 16.00
Útsettur
NSÍ-Víkingur
Støðan undan 16. umfari
B36 37
HB 30
Víkingur 26
EB/Streymur 22
NSÍ 21
KÍ 20
ÍF 17
AB 13
B68 9
Skála 9
