Tað var ikki smávegis heglingsæl, sum í gjár rakti Åmli, sum er ein kommuna í fylkinum, Agder í Noregi.
Tá norska kvinnan, Kari Anne Overskeid og sambúgvi hennara, koyrdu ígjøgnum Åmli í gjár, sóu tey, at heglingur, sum var komin niður í økinum, næstan var á stødd við tennisbóltar.
- Eg havi ongantíð áður sæð so stóran hegling, segði hon í samrøðu við norska kringvarpið, NRK. Hon og sambúgvin høvdu verið ein túr í Treungen, sum tey rópa staðið, og har høvdu tey róð í lítlum báti.
Norskir miðlar vita at siga, at tað var ikki bara í Agder, at tað heglaði í gjár, og sagt verður, at stórur heglingur kom niður fleiri staðni í Telemørkini.
Tá Kari Anne Overskeid og sambúgvin komu aftur til bygdina, lógu bløð og annað eftir øllum vegnum, sum grova heglingsælið hevði rivið við sær.
Tað sást eisini á vegnum, at heglingurin hevði gjørt um seg, eins og fleiri bilar, sum høvdu roynt at søkt sær skjól millum trøini, høvdu fingið fleiri buglur.
- Vit eru bara fegin um, at vit ikki vóru í økinum, tá tað heglaði, sigur Kari Anne Overskeid.
##med2##
Ein onnur kvinna, Elin Try, var stødd beint uttan fyri Åmli, tá heglingsælið gjørdi um seg í Adger. - Øll ferðsla steðgaði upp, og bilførarar noyddust at søkja sær skjól. Her vóru bilar, sum høvdu fingið fleiri buglur, leggur hon aftrat.
Vaktleiðari á Meteorologiska Stovninum í Noregi, Per Egil Haga, sigur, at fleiri hava vent sær til stovnin um heglingsælið, sum rakti fleiri staðni í Telemørkini og í eystara parti av Adger.
- Tað er ikki so óvanligt, at heglingur rakar, eisini um summarið, men tað er ikki vanligt, at heglingurin er so stórur, sum hann var hesaferð, leggur Per Egil Haga aftrat.
