Í Skálavík hevur kommunan gjørt stórarbeiði við at taka upp grót, sand og tara úr bátahylinum.
- Tað er meira enn ein hálv øld síðan, at bátahylurin varð bygdur, og sum árini eru liðin hevur nógv hópað seg upp í hylinum.
Borgarstjórin í Skálavíkar kommunu, Linjohn Christiansen, sigur, at fyritøkurnar, Rókin og Thomsen, í felag hava tikið sær av at dýpa bátahylin.
- Teir hava brúkt eina gravmaskinu við sera longum armi, sum við at flyta seg runt á bryggjuni rakk um botnin í øllum hylinum.
Borgarstjórin vísir á, at umleið 3000 tons av grót-og sandtilfari eru tikin upp úr hylinum.
Nú kunnu bátaeigarar ekkaleysir brúka hylin aftur.
- Arbeiðið, sum nú er gjørt, fer eisini at gera, at størri nytta verður í bedingini, sum vit hava í Skálavík, sigur Linjohn Christiansen.
