Herfyri legði Sambandsflokkurin eitt uppskot fyri Løgtingið um at hækka prísin á bensini og diesel, umframt eitt uppskot um at vegskatturin eisini skuldi hækka.
Hesi bæði uppskotini vóru ein partur av eini heildarloysn hjá Sambandsflokkinum, har endamálið var at avtaka bummgjaldið í Vágatunlinum og í Norðoyatunlinum.
Fyri at leggja upp fyri mistar inntøkur í hesum sambandi, skeyt Sambandsflokkurin ístaðin upp at hækka prísin á bensini og diesel nakað, og at hækka vegskattin nakað.
Sambandsflokkurin boðaði frá, at endamálið er at javntseta øll, sum brúka almenna veganetið.
Les eisini: Undirsjóvartunlarnir: Nú skal bummgjaldið strikast
Men fyri nøkrum døgum síðani feldi Løgtingið uppskotið um at avtaka bummbjaldið, og so er endamálið við at hækka prísin á bensini og diesel, og vegskattin, dottið burtur.
Tískil hevur Bárður á Steig Nielsen, formaður í Sambandsflokkinum nú boðað Løgtinginum frá, at hann tekur uppskotið um at hækka prísin á brennievnið, og uppskotið at hækka vegskattin, aftur.
Og tá ið eingin annar tók uppskotið til sín og legði tað fram aftur í Løgtinginum, eru tey sostatt burturdottin og verða ikki viðgjørd í Løgtinginum.
