Formil 1
Tvífaldið heimsmeistarin, finnin Mika Hakkinen fer hósdagin at seta seg handan stýrið á einum McLaren Mercedes formil 1 bili. Hetta er fyrstu ferð, síðan hann gavst í formil 1 í 2001, at Hakkinen koyrir ein formil 1 bil. Høvið er ein royndarkoyring á Circuit de Catalunya við Barcelona.
Tað er Hakkinen sjálvur, ið hevur ynskt at royndarkoyrt bilin. Hann sigur við f1.com, at hetta er eitt høvið at fáa innlit í, hvussu nógv formil 1 hevur flutt seg hesi seinastu fimm árini. Hakkinen, ið enn koyrir kapp fyri Mercedes í týska touringbil meistaraheitinum DTM, er enn ein sera habilur koyrari, og eisini í McLaren liðnum, fegnast man um, at tey hava fingið ein so royndan koyrara at royna bilin.
Tó leggur liðið dent á, at ongar ætlanir eru um fleiri royndarkoyringar.
McLaren kunngjørdi longu í síðstu viku, at ungi bretin Lewis Hamilton fer at koyra fyri liðið komandi ár saman við heimsmeistaranum Fernando Alonso. Samstundis varð kunngjørt, at royndarkoyrarnir hjá liðnum verða Pedro De La Rosa og Gary Paffett.
Hjá BMW var ein onnur gomul hetja handan stýrið hesa vikuna. Fyrrverandi Champ Car meistarin og formil 1 koyrarin Alessandro Zanardi, misti bæði beinini í eini Champ Car vanlukku í 2001. Hetta hevur ikki steðga hansara yrkisleið sum koyrari. Hann hevur beinprotesir og brúkar hesar, tá hann koyrir. Hann koyrir fyri BMW í heimsmeistarakappingini fyri touringbilar, og hevur vunnið tvær koyringar fyri liðið. Bæði bilur og protestur vórðu tillagaðar, m.a. vóru protesirnar festar í bremsu og speedara við velcro. Hetta gekk sera væl og sambært liðnum var skjótasti tíðin hjá Zanardi 1.21.630 sera sannførandi.
