Nú kórfestivalurin er farin um bak, og føroysk kór enn einaferð hava víst okkum, hvussu fjølbroytt og rík okkara kórmentan er, er Norðurlandahúsið til reiðar at vísa fram, hvat rørir seg á altjóða kórpallum.
Í mai mánaði koma nevniliga tvey úrmæliskór úr ávikavist Sveis og Týsklandi til Føroya at framføra í Norðurlandahúsinum saman við føroyskum vertskórum. Fyrra konsertin er fríggjakvøldið 6. mai tá Männerstimmen Basel og Tórshavnar Manskór fara at hava eina rimmar konsert í Høllini.
Männerstimmen Basel hevur seinastu árini bergtikið bæði áhoyrarar og dómarar á konsertum og í altjóða kappingum. Í 2014 og 2010 vunnu teir gull á World Choir Games í ávikavist Riga og Cincinnati (Olympisku leikirnir fyri kór), og í 2012 vunnu teir heiðurin sum bæði besta manskór og besta kór á kórfestivali í Montreux í heimlandinum Sveis.
Männerstimmen Basel framføra í knæbuksum og floyalsjakkum, men hetta gamla “lookið” stendur sum ein týðiligur mótsetningur til ungu sangararnar og teirra livandi framførslur.
Tórshavnar Manskór hevur í ár verið virkið í 30 ár og hevur øll árini lagt seg eftir at framføra kórsan á høgum støði.
Seinna konsertin er við týska gentukórinum Mädchenchor Hamburg og føroyska barnakórinum Cantus. Tey framføra í Klingruni leygardagin 21. mai.
Mädchenchor Hamburg telur 45 gentur í aldrinum 14-22 ár og hevur til endamáls at stimbra áhugan fyri kórsangi og kórimprovisasjón. Kórið hevur framført í flestum londum í Evropa umframt í Suðurafrika og í miðeystri og hevur tvær ferð verið í finaluni í víðagitnu týsku kórkappingini Deutscher Chorwettbewerb.
Cantus er úrvalsbarnakór úr Tórshavnar Musikkskúla við børnum í aldrinum 11-14 ár.
Á báðum konsertunum hava kórini hvør sína skrá, umframt at tey framføra onkur verk saman. Skráirnar verða fjølbroyttar við nýggjum og gomlum altjóða tónleiki – alt frá kirkjutónleiki úr 1300talinum til kórútgávur av sangum hjá Coldplay.
