Tað var í 1849, at sergent Frederik Hansen Jager kom til Føroyar sum ovasti á Skansanum.
Sama ár fóru menn undir at byggja honum hús, og stóðu tey liðug í 1850.
Húsini vóru bygd yviri við Strond, ella sum økið tá kallaðist, "Blegestykket".
Jager var virkin fotografur, og í 1850 innrættaði hann sær fotoatelier í norðara endanum í húsunum. Hetta var fyrsta fotoateleir í landinum.
Jager búði í húsunum til 1861, tá hann flutti aftur til Danmarkar.
Í 1865, tá "politikorpset" bleiv sett á stovn, og fram til 1875, búði "kvartermester" í Sersjanthúsunum.
Í 1875, tá meslingaepidemiin breyt út, og fram til umleið 1919, bleiv húsið brúkt sum epidemihús, og eftir tað vórðu tey leigað út til íbúðir.
Í dag stenda Sersjanthúsini (ella rættari, ein lítil partur á teimum) úti á Reyni.
Á myndini sæst at fyrsta vegastrekki yviri við Strond er gjørt. Arbeiðið bleiv boðið út í 1934, og er myndin tí tikin einaferð miðskeiðis í 1930-unum.
Innsettu myndina hevur Jager sjálvur tikið í 1852, og vísir hon hvussu Sersjanthúsið sá út, tá tað var nýbygt.
Tey, sum hava okkurt at viðmerkja í sambandi við myndina, eru vælkomin at seta seg í samband við Birgar Johannessen, ið savnar tilfar til Havnar leksikon, á telefon 314647 / 273168.
