Fyrrverandi stórdysturin endaði málleysur

Manchester City er nú greitt oddalið í Premier League, eftir at Pep Guardiola og hanara menn vunnu 1-0 á Sheffield United, meðan Manchester United spældi málleysan móti Arsenal.

Tað var ein tíð, har dystirnir millum Arsenal og Manchester United vóru teir størstu í Premier League, men hóast bæði liðini hava havt eina ávísa viðgongd í seinastuni, so er langt frá døgunum, tá Patrick Vieira og Roy Keane plagdu at vera í hornatøkum á miðvøllinum.

Dysturin á Emirates leikvøllinum endaði við málleysum javnleiki. Nærmastur at skora mundi vera Edinson Cavani. Áleyparin hjá Manchester United hevði tveir stórar málmøguleikar, men tað bleiv ikki til mál.

Fyri aðru ferð upp í slag var Sheffield United á vitjan í Manchester. Í farna umfari vann botnliðið á Manchester United, men hesa ferð gekk ikki eins væl. Tað endaði tó bara við einum teprum tapi móti Manchester City, ið vann 1-0. Gabriel Jesus skoraði málið tíðliga í dystinum.

Mest óvæntaða úrslitið kom á Goodison Park. Everton hevur fingið eina góða byrjan upp á kappingarárið, men við 2-0 tapinum móti Newcastle í dag, er liðið dottið niður á sjeynda pláss á stigatalvuni.

Crystal Palace vann 1-0 á Wolverhampton. Evnaríki Eberechi Eze skoraði málið. Uppflytarabrakið millum West Bromwich og Fulham endaði við javnleiki 2-2. Ein dysturin er í kvøld millum Southampton og Aston Villa.