Fríði og FC Suðuroy hanga í

Tað er framvegis góður møguleiki fyri, at FC Suðuroy fer at flyta niður, men teir á Vágseiði stríðast við lív og sál fyri at halda tørn um plássið í 1. deild.

Í dag hevði FC Suðuroy vitjan á Vágseiði av B71. FC Suðuroy vann 4-3, eftir at B71 í steðginum var frammanfyri 2-1.

Úrslitið ber við sær, nú tað resta trý umfør, at FC Suðuroy er á níggjunda plássi við 26 stigum. Tað er eitt stig aftur til EB/Streym, tað eru trý stig fram til B36, og tað eru fýra stig fram til KÍ.

Fríði Holm setti hol á fyri heimaliðið, tá ið fimm minuttir vóru farnir. Clayton Soares javnaði til 1-1, tá ið hann umsetti brotsspark til 1-1, og lítla løtu undan steðginum vóru heimamenninir óhepnir við nærra stólpa at gera sjálvmál, eftir at B71 hevði lagt innfyri úr høgru.

Heri Kjærbo javnaði til 2-2, tá ið seinni hálvleikur var tíggju minuttir gamal, og so skoraði FC Suðuroy tvey mál og legði seg á odda 4-2. Málskjúttar vóru Fríði Holm, sum harvið varð tvífaldur málskjútti. Hann skoraði úr stuttari fjarstøðu, og akkurát innskifti Dávid Jónsson Lisberg økti til 4-2, tá ið hann varð spældur leysur eitt sindur til høgru.

Tá vóru 86 minuttir farnir. Minuttin frammanundan 4-2 málið misti B71 Gunnar Lydersen, sum sá gula kortið fyri aðru ferð. Kortini eydnaðist tað B71 at minka um munin til 4-3, tá ið Jónas Warner við langskoti eitt sindur úr høgru sendi bóltin í handara síðunetið. Sandoyingar endaðu við níggju monnum, tí Victoriano Jose Fragola sá síðstu løtuna gula kortið tvær ferðir.

B71 er á fjórða plássi við 37 stigum.

Leygardagin fær B71 vitjan av NSÍ, og sama dag fær FC Suðuroy vitjan av Víkingi.

Leygardagin 16. oktober

Skála – KÍ

B36 – AB

B71 – NSÍ

FC Suðuroy – Víkingur

Sunnudagin 17. oktober

HB – EB/Streymur