Endamálið við báðum døgunum er at savna føroyskar fyritøkur í eitt forum, har nýskapan í arbeiðsgongdum innan altjóðagerð er høvuðsevnið. Hesir dagar leggja dent á nýskapan í teimum mannagongdum, sum eru í sølu- og útflutningsliðinum hjá fyritøkuni.
Fyrri dagurin, 25. november er ætlaður framleiðslu- og tænastufyritøkum, sum longu útflyta ella hava ætlanir um at útflyta. Seinni dagurin, 26. november, er ætlaður verandi útflutningsvirkjum innan fiskaútflutning.
Fyritøkan GEMBA Innovation, sum er ein ráðgevingarfyritøka við drúgvum royndum á nýskapanarøkinum, luttekur á evnisdøgunum við áhugaverdum fyrilestrum, sum taka støði í royndum og verkætlanum, sum Gemba hevur gjørt í samstarvi við Danmarks Eksportråd og Dansk Industri. Harafturat luttekur Gemba við workshops, sum taka útgangsstøði í gerandisdegnum hjá føroysku fyritøkunum og teirra møguleikum og avbjóðingum á altjóða marknaðinum.
Føroyskar fyritøkur hava styrkina og liðiligleikan at vera nýhugsandi í framleiðsluni. Men spurningurin er, um fyritøkur mangla nýhugsan í sølu- og útflutningsliðinum. Kundi eitt "útflutningsforum", har høvi var at viðgera marknaðar- og útflutningsspurningar tvær ferðir árliga, givið vinnuni íblástur? Meiri um kostnað og tilmelding á heimasíðuni hjá Vinnuhúsinum, www.industry.fo. Avmarkað atgongd.
