- Føroyska liðið er sterkt og tað er miðvíst. Tað siga tey í Føroyskt Íslandsrossafelag. Í næstu viku verða tey við í norðurlandameistarakappingini fyri ríðing við íslandsrossum. Kappingin er í Herning í Danmark
- Tað er ein stórur fyrimunur fyri okkara ríðarar og sjáldan hava vit havt betur møguleikar fyri at gera okkum galdandi á fremstu rók enn vit hava hesa fer, sigur Føroyskt Íslandsrossafelag.
Umframt hetta, verður kappingin um heimsmeistaraheitið í 2015 eisini í Herning. Føroyski hópurin sum er úttikin til NM í ár telur fýra fólk og fimm ross.
Tey ið manna landsliðið hesa ferð eru: - Heri D. Dahl á hestinum Vorboða frá Akurgerði - Heri D. Dahl á hestinum Hørði frá Hnausum - Óluva Á Lofti á hestinum Huginn frá Útnyrðingsst. - Elin V. Tindskar. á hestinum Hølkvir frá Ytra-Dalsgerði - Jóanis í Hoygarðinum á greðinginum Marel frá Feti
Hetta er eitt sera sterkt og miðvíst lið , vit nú senda til Herning, siga tey í Føroyskt Íslandsrossafelag
Heri og Óluva, sum bæði búgva í Føroyum, eru uttan iva tvey av teimum ídnastu rossafólkunum við eiga á klettunum og tey eru dagliga við til at stimbra og menna ríðingina her heima. Hvør í sínum lagi hava tey vunnið mest sum allar kappingar her heima.
Jóanis og Elin eiga og reka ein garð við íslandsrossum í Hirtshals. Har hava tey egin ross og ross hjá øðrum í venjing.
- Síðstu mongu árini hava tey verið andlitið hjá føroysku íslandsrossaríðingini uttanlands. Við miðvísum arbeiði síðstu 10 árini vísa tey seg ferð eftir ferð ímillum tey allar bestu í íslandshesta verðini í Danmark.
Rossini hjá Óluvu og Hera vórðu flutt til Danmarkar fyri einum mánað síðani, har Jóanis og Elin tóku ímóti rossunum í Hirtshals og nú verður vant til kappingina. |
