Um vikuskiftið fer Føroya symfoniorkestur á rundferð í sambandi við 30 ára føðingardagshaldið hjá orkestrinum.
Í hesum sambandi verða tríggjar konsertir, ein í Føroyum og tvær í Íslandi.
Rundferðin byrjar við konsert í Norðurlandahúsinum í Føroyum sunnudagin og dagin eftir gongur leiðin til Íslands at spæla tvær konsertir.
Tann fyrra verður í HOF á Akureyri mánakvøldið og tann seinna verður í nýggja stásiliga mentanarhúsinum, Hørpuni, í Reykjavík mikukvøldið.
Á skránni er kenda verkið eftir Edvard Elgar, Enigma Variatiónirnar, og ein tann best kenda klaverkonsertin yvirhøvur, tann fyrsta hjá Peter Tchaikovsky, er eisini á skrá.
Solistur verður russiski klaverleikarin, Pavel Raykerus.
Í føðingardagsgávu hevur føroyski tónasmiðurin Sunleif Rasmussen latið orkestrinum eitt verk, kallað Veitsla og tað verður eisini spælt á konsertunum.
Sunleif Rasmussen er ein av kendastu føroysku tónasmiðunum, og fekk í 2002 Tónleikavirðisløn Norðurlandaráðsins fyri verkið ”Oceanic Days”.
- Veitsla, er ein frísklig føðingardagsheilsan frá tónasmiðinum, og verður frumframført í sambandi við hesa konsertverkætlan, siga tey í symfoniorkestrinum.
