Eitt ferðafólkaflogfar boðaði í dag frá trupulleikum við næsahjólinum og noyddist at lenda í Gardemoen í Oslo.
Tað sigur norska løgreglan seint seinnapartin í dag á X, fyrrverandi Twitter.
- Øll tilbúgvingin var klár, um flogfarið skuldi fingið trupulleikar undir lending, men flogfarið er lent, og eingin hevur fingið likamlig mein.
Tað sigur norska løgreglan í einari dagføring fyri løtu siðan.
Tíðindavaktin hjá Avinor sigur, at tað er Global Reach Aviation, sum eigur flogfarið, ið er eitt minni ferðafólkaflogfar av slagnum, Mitsubishi CRJ-900LR.
Global Reach Aviation hevur støð í Billund í Danmark.
Sambært Flightradar var flogfarið á veg úr London til Tromsø í Noregi, tá flogskiparin bað um at sleppa at lenda í Gardemoen.
Norska løgreglan sigur, at tað var full tilbúgving í Oslo, tá flogfarið lendi. Greitt er ikki í løtuni, hvussu nógv ferðafólk vóru í flogfarinum.
