YVIRGANGUR
Blaðið Welt am Sonntag hevur fingið fatur á einari meting, sum týska fregnartænastan hevur gjørt av vandanum fyri yvirgangsatsóknum í Evropa.
Niðurstøðan í metingini er, at vandin fyri yvirgangi er serliga stórur í Danmark, Fraklandi, Bretlandi, Spania, Italia og Turkalandi. Harafturímóti er lítil vandi fyri yvirgangi í Noregi og Svøríki. Tá talan er um fjarløgd lond, heldur týska fregnartænastan, at vandin er størstur í Avstralia, Teilandi, Indonesia og Filipsoyggjunum.
Vandin er serliga stórur í teimum stóru býunum og serliga á støðum, har nógv fólk koma saman so sum handilsmiðstøðum og týdningarmiklum ferðamannamálum, men vandin er eisini stórur í flog- og skipaferðsluni.
Týska fregnartænastan sigur sambært Welt am Sonntag, at vandin fyri yvirgangi er størstur í londum, har nógv fólk taka undir við yvirgangsmonnunum, og har trygdartiltøkini ikki eru nóg góð. Fregnartænastan heldur, at al-Qaeda er framvegis tann størsti vandin, sjálvt um fleiri av leiðarunum í felagsskapinum eru deyðir ella tiknir. Eitt nú eru Said el-Adel og Abu Mussab al-Zarqawi framvegis á lívi, og teir hava tætt tilknýti til Evropa, skrivar Welt am Sonntag.
Trygt at ferðast í Danmark
Tað er framvegis trygt hjá ferðafólki at koma til Danmarkar
Hóast tann týska fregnartænastan nevnir Danmark sum eitt av teimum londunum, har vandin fyri yvirgangi er stórur, halda teir donsku myndugleikarnir ikki, at ferðavinnan er serligt álopsmál.
? Vit hava ikki sett nøkur serlig trygdartiltøk í verk í sambandi við ferðavinnuna her, sigur Ole Torpegaard í danska uttanríkisráðnum við norska blaðið VG. Heldur ikki norska sendistovan í Keypmannahavn sigur seg hava fingið nakra ábending um, at vandin fyri yvirgangi er vaksin har.
Norska reiðaríið Color Line skal flyta umleið eina millión ferðafólk ímillum Noreg og Danmark í summar, men heldur ikki har hava tey fingið nøkur boð um størri vanda fyri yvirgangi, sigur kunningarstjórin, Helge Otto Mathisen, við VG.
