Nú skal illa umstrídda ferðaavgjaldið takast av.
Tað vil Poul Michelsen, løgtingmaður fyri Framsókn.
Hann hevur nú lagt uppskot fyri Løgtingið um at avtaka ferðaavgjaldið upp á 65 krónur, sum verður goldið í landskassan av hvørjum ferðaseðili, sum verður keyptur við Atlantsflogi og Norrønu.
Hann sigur, at hetta fer at kosta landskassanum 10 milliónir í mistari inntøku.
Hetta er fjórðu ferð, at Framsókn leggur uppskot fyri løgtingið um at avtaka ferðaavgjaldið.
Men í 2013 legði landsstýrið sjálvt uppskot fyri løgtingið um at lækka ferðaavgjaldið niður í helvt, ella úr 120 krónur av hvørjum ferðaseðili, niður í 65 krónur.
Men tá var endamálið, at um trý ár, ella í 2016, skuldi avgjaldið verða heilt avtikið.
Men enn er einki hent og nú leggur Poul Michelsen so uppskot fyri løgtingið um at avtaka ferðaavgjaldið heilt.
- Føroyska samferðslukervið skal ikki bara røkka úr Fugloy til Sumbiar, men heilt út til næstu grannalondini. Tí meta vit, at ferðasambandið út í heim er líka týdningarmikið sum ferðasambandið innanlands, sigur Poul Michelsen.
- Ferðakostnaðurin á loftvegis sambandi okkara út í heim, er enn alt ov dýrur og er uttan iva ein av stóru forðingunum fyri, at fólk flyta heim aftur at búleikast og virka í Føroyum.
Tá ið Atlantsflog gjørdist almenn ogn aftur, varð sagt, at endamálið var at fáa prísirnar á ferðaseðlum niður.
- Flogfelagið hevur lækkað ferðaseðlakostnaðin nakað, men enn er langt á mál, sigur løgtingsmaðurin fyri Framsókn.
Hann heldur, at tað almenna má gerast okkurt munagott.
- At taka ferðaavgjaldið burtur er eitt lítið stig á vegnum, sum bæði kann lækka prísin á ferðaseðlum, beinanvegin.
Poul Michelsen vísir á, at eini 250.000 fólk ferðast um flogvøllin um árið og sjóvegis koma og fara 120.000 ferðafólk.
- Eini 160.000 av teimum gjalda ferðaavgjald, so verður gjaldið tikið heilt burtur, fer tað at kosta landskassanum einar 10 milliónur krónur.
- Ein bíligari ferðaseðil fer at stimbra upp undir eina spírandi ferðavinnu, eins og tað verður meiri lokkandi at búsetast í Føroyum.
Eisini eigur at havast í huga, at teir umleið 25.000 føroyingarnir, sum búgva uttanfyri Føroyar, ofta – orsakað av ferðaprísinum – lata vera við koma heim at ferðast sigur Poul Michelsen.
