Seinasta umfar í Champions League bólkaspælinum fór í kvøld av bakkastokki.
Undan umfarinum var serliga stórur spenningur í bólki B, har Wolfsburg, Manchester United og PSV øll høvdu møguleika fyri at spæla seg beinleiðis víðari í kappingini.
Og felagið sum endaði við svartaperi, var enska stórfelagið, Manchester United, sum tapti útidystin móti Wolfsburg 3-2, samstundis sum PSV vann sín heimadyst móti CSKA Moskva 2-1.
Dysturin millum Wolfsburg og Manchester United var undirhaldandi og bylgjaði aftur og fram frá fyrsta til seinasta bríksl. Manchester United legði seg fyrst á odda eftir 10 minuttum, men lítla løtu aftaná javnaði Wolfsburg til 1-1. Tá gott og væl 25 minuttir vóru leiktir, legði Wolfsburg seg á odda 2-1, eftir eitt frálíka væl spælt mál av týska felagnum.
Manchester United royndi í seinna hálvleiki at trýsta av øllum alvi, og tá 82 minuttir sá tað út til at bragda, tá teir javnaðu til 2-2 eftir hornaspark. Men bara lítla løtu aftaná økti Wolfsburg enn einaferð til 3-2, sum eisini varð endaliga úrslitið.
Av øðrum dystum kann millum annað eisini nevnast, at Real Madrid á heimavølli vann 8-0 móti svenska Malmø FF, og at Manchester City á heimavølli vann 4-2 móti Borussia Monchengladbach.
Úrslitini í kvøld:
Bólkur A:
Paris Saint Germain – Shaktar Donetsk 2-0
Real Madrid – Malmø 8-0
(Real Madrid og Paris Saint Germain víðari úr bólkinum)
Bólkur B:
Wolfsburg – Manchester United 3-2
PSV Eindhoven – CSKA Moskva 2-1
(Wolfsburg og PSV Eindhoven víðari úr bólkinum)
Bólkur C:
Benfica – Atletico Madrid 1-2
Galatasaray – FC Astana 1-1
(Atletico Madrid og Benfica víðari úr bólkinum)
Bólkur D:
Manchester City – Borussia Monchengladbach 4-2
Sevilla – Juventus 1-0
(Manchester City og Juventus víðari úr bólkinum)
