Landgrunnur. Umboð fyri føroyskar og danskar myndugleikar løgdu hósdagin kravið um ytra landgrunnin á Føroyaháslættanum munnliga fyri landgrunsnevnd Sameindu tjóða, CLCS upplýsir Uttanríkisráðið.
Sambært altjóðarætti eiga øll strandarlond rætt til landgrunn út fyri teirra strond.
Havrættarsáttmálin frá 1982 ásetir tó, at um eitt strandarland krevur landgrunn uttanfyri 200 fjórðingar, skal tað prógvast fyri CLCS, at ytri landgrunnurin er framhald av tess landøki. CLCS ásetir ikki mark, men tekur einans støðu til, um kravið, ið er lagt fyri nevndina, er vísindaliga nóg væl undirbygt, t.e. at landgrunnurin er framhald av avvarðandi strandarlandi.
Umvegis ST aðalskrivaran lótu landsstýrið og danska stjórnin 2. desember 2010 CLCS vísindaligu próvgrundirnar, sum stuðla undir kravið um ytra landgrunnin á Føroyaháslættanum. Samlaða føroyska kravið er 608.890 km2,og ytsta markið røkkur 820 fjórðingar úr Føroyum sigur Uttanríkisráðið
Vársetan hjá CLCS er í ST høvuðsborgini í New York í hesum døgum, og fekk ein sendinevnd mannað við føroyskum og donskum embætisfólki í dag høvi at leggja landgrunskravið munnliga fyri CLCS. Sendinevndin greiddi frá ymiskum viðurskiftum av týdningi fyri føroyska kravið. Framløgan er formligur partur av samlaða próvtilfarinum, sum CLCS skal taka støðu til.
Írland, Bretland og Ísland krevja øki, ið umskara føroyska/danska kravið. Írland og Bretland handaðu CLCS teirra krøv á økinum í mars 2009, meðan Ísland ikki enn hevur latið inn sítt krav.
Um fleiri lond seta fram krav um sama landgrunn, skal CLCS hava samtykki frá hinum pørtunum at viðgera próvtilfarið. Støðan hjá landsstýrinum og donsku stjórnini er, at besti mátin at handfara tey umskarandi krøvini er at viðgera tey samstundis.
Fleiri lond hava latið inn krøv um ytra landgrunn og próvtilfarið, ið CLCS skal taka støðu til, er umfatandi. Tí er torført at meta um, nær CLCS fer undir at viðgera føroyska/danska kravið. Roknað verður við, at tá ið CLCS fer undir viðgerðina, fer tað at taka eini tvey ár frá byrjan til enda.
