Í summar fer Føroya Tele at bjóða tráðleyst breiðband við háferð. Nýggja tøknin fer í næstum at tryggja tráðleyst breiðband við háferð bæði á landi og á føroyskum sjóøki
Føroya Tele fer í summar at taka í nýtslu fyrsta part av nýggjari tøkni, sum kann veita tænastur á tráðleysum breiðbandi við háferð. Nýggja netið fer í summar í fyrstu atløgu at fevna um Tórshavn, Klaksvík, Skálafjørðin og flogvøllin, men tá ið netið er liðugt útbygt, fevnir tað um meginpartin av bygdum landøki og føroyskt sjóøki.
Tráðleysa breiðbandsnetið er grundað á mest framkomnu tøknina, sum ofta verður nevnd 3½ G. Í fyrsta umfari verður ferðin 14 Mbps, men longu innan fyrsta árið verður ferðin økt upp í 21 Mbps.
Føroya Tele hevur seinasta árið kannað, hvør útgerð er best hóskandi til føroyska marknaðin, og eftir hesa tilgongd var avgjørt at skriva undir sáttmála við svensku fyritøkuna Ericsson. Samráðingar vóru eisini við kinesisku feløgini Huaway og ZTE, men valið á fall á Ericsson, tí tann loysnin tryggjar kundunum hjá Føroya Tele bestu dygdina, samstundis sum prísurin verður kappingarførur. Svenska útgerðin hóskar sum heild best til eitt lítið telefelag sum Føroya Tele.
Í Ericsson fegnast tey um avtaluna við føroyska felagið.
- Tað er sjáldan eg fái møguleika at vitja ein kunda, ið vit hava samstarvað við í meira enn 100 ár. Og henda avtalan styrkir um samstarvið okkara millum, sigur Lars Tofft, stjóri í Ericsson Danmark, sum vitjaði í Føroyum í samandi við nýggju avtaluna.
Kristian Davidsen, samtaksstjóri í Føroya Tele, fegnast eisini um nýggja breiðbandið, sum tryggjar kundum hjá Føroya Tele atgongd til munagóðar datatænastur bæði og sjógvi og landi.
- Hetta staðfestir okkara støðu sum fremsti veitari av samskiftistænastum á føroyska marknaðinum. Vit valdu Ericsson, tí teir tryggja okkum eina skjóta loysn, har dygdin er í hásæti. Og hetta er neyðugt, tí føroyski brúkarin er kræsin og vil hava loysnir, sum virka, sigur Kristian Davidsen, stjóri í Føroya Tele.
