Fyrireikararnir av stóru DTT-ráðstevnuni, sum hevur verið hildin í estlendska høvuðsstaðnum Tallinn hesa vikuna, høvdu boðið menningarstjóranum í Føroya Tele at hava eina framløgu um digitalt sendinet.
Stívliga 100 luttakarar frá almennum og privatum stovnum og fyritøkum hava verið savnað at viðgera broytingina frá analogum til digitalt sjónvarp í Europa. Ráðstevnan vendir sær serliga til tey eystureuropeisku londini, sum mennast nógv í hesum døgum, men luttakarar verða eisini úr fleiri vestureuropeiskum londum.
Í flestu europeiskum londum verður nú dúgliga skift orð um, hvussu best er at talgilda (digitalisera) sjónvarpssendinetini. Enn eru flestu londini komin stutt á leið, men ES-kommissiónin hevur gjørt av, at øll tey analogu sendinetini í Europa skulu verða sløkt í seinasta lagi í 2012.
Føroyar spæla við
Í tí stóra prátinum um digitalisering kunnu føroyingar eisini verða við, tí Føroyar vóru eitt hitt fyrsta landið, sum fekk talgilt sendinet. Hetta hendi, tá Televarpið varð stovnað.
Televarpið var eisini fyrsta skipanin, sum var handilslig burturav, og eisini fyrsta fyritøkan av sínum slagi, sum gevur avlop av rakstrinum. Hetta, hóast Føroyar eru sera avbjóðandi sum marknaður við sínum avmarkaða fólkatali og truplu landafrøði, sigur Tróndur Djurhuus, menningarstjóri.
Við síni serligu samanseting av vanligari og heldur bíligari tøknifrøði og ikki minst teirri serligu føroysku KT-skipanini, sum stýrir rakstrinum, verður Televarpið tí hildið at vera best eydnaða DTT-fyritøkan higartil, sigur hann.
Vakti ans
Tróndur Djurhuus hevði sína framløgu hósdagin undir heitinum: »Successful Commercial Introduction in a Challenging Environment - DTT in the Faroe Islands«.
Og hendan framløgan fekk sera stóra umrøðu.
Tað var heilt týðuligt, at tað var nógv størstur áhugi fyri okkara framløgu. Okkara loysn varð nógv umrødd, og fleiri lond vildu hava møguleikan at fáa fleiri upplýsingar. Eg havi eisini havt eitt prát við estlendska mentamálráðharran um okkara skipan, sigur Tróndur Djurhuus.
Umframt Trónd umboðaði Edvard í S. Joensen Føroya Tele, meðan Televarpið varð umboðað av Lailu Hentze.
