Tað var niðurstøðan hjá Bárði Nielsen. Í gjárkvøldið kjakaðist hann í Degi og Viku við Rigmor Dam, sum hevur lagt fram uppskot um at broyta hesa órímuligu skipan.
Í veruleikanum er talan um eina kamufleraða lønarhækking til politkarar av bygd, tað er einki dulsmál. Tað gav at býta, tá Bill Justinussen undir orðaskifitnum tingi brikslaði Rigmor Dam, at hon kann fara heim at tøma uppvaskimaskinuna millum tingfundirnar. Hvør skal siga, tað kann Bill Justinussen ikki, og tí skal hann hava meira í løn.
Málið um skattafríu koyripengarnar hevur mangan verið frammi áður – og vit hava ferð eftir ferð víst á, hvussu hetta máar støði undan trúvirðinum á poltisku skipanina, tá tingfólk leggja byrðar á fólkið, sum tey ikki sjálvi vilja bera.
Eitt dømi er skattalættin til tey ríku, annað dømi er lønarsteðgurin á almenna arbeiðsmarknaðinum – samstundis sum Arbeiðsloysistryggingin repar seglini, tí ráð verða ikki løna teimum mongu arbeiðsleysu, sum tí fáa minni í inntøku.
Men løgtingsmenn vilja ikki bera sín part. Tað vilja landsstýrisfólkini heldur ikki. Samgongan heldur tað vera í lagi, at vit skattgjaldarar gjalda landsstýrisfólkunum eina millión krónur um árið í skattafríari løn. Hvat er hetta fyri hugburður at hava?
Vit kunnu saktans fylgja bæði Rigmor Dam og Bárði Nielsen, tá tey siga, at landsstýrislønirnar eru ov lágar. Bárður Nielsen helt, at tey áttu at fingið 70.000 krónur um mánaðin, og at skattafríu koyripengarnir kunnu vera ein kompensatión.
Argumentið um at landsstýrisfólk hava sítt arbeiðspláss heima við hús, tað heldur ikki, tá tey hava hvør sítt kongaríki í høvuðstaðnum, skrivstovum og hópin av starvsfólki, sum tey varða av.
Hetta málið um skattafríu koyripengarnar er eitt symptom upp á eina sjúka politiska skipan. Eingin løgmaður hevur torað at tikið stigið. Ein nevnd verður sett, og so koyrir tað bara víðari.
Tað sum er mest hugstoytt er, at hetta vísir nakrar politikarar, sum seta seg sjálvar hægri enn vanlig fólk. Teir halda seg sjálvar vera so nógv verdar, at teir ikki skulu lata tað sama til samfelagið, sum øll onnur.
At vald korrumperar er so ofta prógvað. Við júst hesum málinum kundi samgongan prógvað tað mótsætta, men tað tykist vilji ikki vera til, tí tongdin at nøra um egnan búk er sterkari...
