Tá gingu søgur um, at Bogi Andreasen var á veg úr Tjóðveldinum. Men hann hevur sjálvur ongantíð váttað hetta – og heldur ikki avsannað tað.
Kortini hevur Bogi Andreasen ikki dult fyri, at hansara stóri áhuga fyri politikki saktans kann føra til, at hann stillar upp til løgtingsvalið eisini.
Einki bendir tó á, at hann stillar upp fyri Tjóðveldi, og hann er ikki millum nøvnini, sum higartil eru komin fram í sambandi við uppstilling hjá Tjóðveldinum.
Sambært fleiri lesarabrøvum, hann hevur skrivað seinastu tíðina, so førir hann beinleiðis fólkaflokspolitikk.
Fríggjadagin byrjar hann eitt lesarabræv soleiðs:
»Sosialistisku hógvarnir stungu undan, tá Aksel V. Johannesen eftir floksfund í gjár kunngjørdi, at Javnaðarflokkurin fer at lætta skattin á miðalinntøkum og afturfyri at herða skattin á vinnulívið«...
Vit eru samdi við Boga í, at tað er skeivt at skatta vinnuna so nógv, at hon hoknar og ikki megnar at halda sær uppi og harvið arbeiðsplássum, sum aftur eru trygd fyri, at vit kunnu varðveita vælferðarsamfelagið, tí hetta er keðiligur øvundsjúkupolitikkur!
Men tað er meira politisku undirtónarnir hjá varaborgarstjóranum í Havn – valdur fyri Tjóðveldi – sum bera so nógv brá av fólkaflokspolitikki, at vit gita, at Bogi Andreasen er á listanum hjá Fólkaflokkinum til løgtingsvalið.
– Kanska Bogi Andreasen er inspireraður av Heðini Mortensen, sum gjørdi kvettið við at skifta flokk. Kanska Sjúrður Skaale eisini ger kvettið. Hvussu verður og ikki, so frætta vit alt hetta um fáar vikur.
