Tá venjingarlega var á Eiði í heyst, vóru skeiðsleiðarar úr Russlandi við, sum tóku hópin út, ið skal manna landsliðið í estetiskum fimleiki. Ein av hesum var Olga Ponikarova, ið samstundis lovaði at taka sær av landsliðnum sum høvuðsvenjari.
Hon skal taka sær av seriuni og fylgja við, hvussu fimleikararnir mennast, og eisini hevur hon síðsta orðið at siga, tá fimleikararnir skulu takast út til liðið til HM-kappingina, sum verður í Týsklandi næsta ár.
Olga Ponikarova heldur føroysku fimleikararnar vera so mikið væl fyri, at teir kunnu vera millum 10 tey bestu liðini, men kortini er okkurt, ið resta í, áðrenn málið kann røkkast. Tað er í tí sambandi, at Fimleikasambandið nú hevur gjørt avtalu við Elsu Mariu Bærentsen um, at hon skal vera hjálparvenjari.
Millum annað skulu estetisku fimleikararnir gera meira við eitt nú balletdans, umframt at teir skulu fáa betri smidleika og betri kropsliga konditión. Her hevur Elsa Maria nakað at geva, tí hon undirvísir í balletdansi, so tað verður serliga hesum partinum, hon skal taka sær av.
Føroyar vóru fyri fyrstu ferð við í einari HM-kappingin í 2005, tá kappingin var í Greve í Danmark, og síðani hevur føroyskt landslið verið við hvørja ferð.
