Týsdagin hin 31. oktober, sum er týsdagin í næstu viku, verður fundur fyri allar eldru borgarnar í Sjóvar kommunu - frá 60 árum og uppeftir.
- Fundurin verður í bygdahúsinum á Strondum, og byrjað verður klokkan 19. Fyrireikararnir siga, at tað er ikki neyðugt at geva boð um luttøku.
Eftir fundin fer Eldraráðið fyri Roðan at bjóða kaffi, te og heimabakaða skuffukøku.
Á tiltakinum hesaferð verður dentur lagdur á kunning um Vitjunartænastuna hjá Roðanum, og her verður demens-filmur vístur, sum Eldraráðið hevur fíggjað.
Kunning verður eisini um heilsugóðan mat og rørslu og her verður kunnað um munin á einsemi og tað at vera einsamallur ella einsamøll.
- Her verður eisini kunning um hospice, sms-skipan og ymiskt annað, siga fyrireikararnir.
Eldraráðið fyri Roðan heitir á tey yngru um at geva teimum eldru boð um henda møguleika, sum kunningarfundurn týsdagin er.
- Fólk eru vælkomin at taka brøvini um SMS-skipanina við á fundin, um tit ikki longu hava sent tey inn aftur til okkum, verður lagt aftrat.
