Fyribrigdini kunnu vera mong, ymisk og summi rættiliga løgin. Viðhvørt eru tey bara har, og í øðrum føri skulu eygleiðingar til fyri at staðfesta, at talan er um verulig fyribrigdi.
Á facebook-síðuni - Koltur - tók Bjørn Patursson í gjár eitt áhugavert fyribrigdi úr Koltri fram, og við livandi myndum vísti hann, at talan er um eitt veruligt sjaldsamt náttúrufyribrigdi.
- Tá eg ein góðan summardag gangi við ferðalagi heim eftir Sjógøtuni fram við Sandinum, plagi eg greiða frá, at Sandurin brádliga ein vetrarmorgun er burtur.
Bjørn Patursson vísir á, at tá hann plagar at siga so, samstundis sum fólk ein summardag síggja vakra sandin, tá misteinkja mong hann fyri at gera ov nógv av.
- Men her er so prógvið, sigur hann og leggur út á facebook-síðuna livandi myndir, tiknar av Sandinum jólaaftan 24. desember - og so aftur sunnudagin, 27. desember.
Jólaaftan er eingin sandur, bara grót, men longu tríggjar dagar seinni er sandurin aftur í mølini í Koltri.
Tey, sum hava hug at hyggja nærri eftir hesum, kunnu fara inn á facebook-síðuna - Koltur - og síggja livandi myndirnar av hesum sjaldsama fyribrigdi.
In.fo hevur loyvt sær at klippa í filmin, soleiðis at fyrra myndin er tikin 24. desember - og hin seinna, 27. desember 2015.
