Tað eydnaðist heldur ikki hesaferð Páll á Reynatúgvu at vinna nóg mikið av atkvøðum til ein løgtingssess. Hann gjørdist nummar 10 á listanum hjá Tjóðveldi, sum merkir, at hann verður fjórði varamaður floksins.
Um so verður, at Tjóðveldi fer í samgongu saman við Javnaðarflokkinum og Framsókn, so fær Tjóðveldi helst trý landsstýrisfólk, sum mest sannlíkt verða úr tingmanning floksins. Tey kundu til dømis verið Høgni Hoydal, Bjørt Samuelsen og Sirið Stenberg.
Tað merkir so, at Eirikur í Jákupsstovu, Liljan Weihe og Erling Eidesgaard fáa sæti sum føst varafólk á tingi fyri tey trý landsstýrisfólkini.
Páll á Reynatúgvu verður við sviðusoð.
Men tá fyrrverandi formaður Javnaðarfloksins og fyrrverandi løgmaður, Jóannes Eidesgaard alment hevur boðað frá, at hann hesaferð vendi gamla flokki sínum bakið og valdi Tjóðveldi, so er sjón fyri søgn, at júst atkvøðan hjá fyrrverandi formanni Javnaðarfloksins er atkvøðan, sum merkir, at Páll á Reynatúgvu ikki sleppur á ting – um so verður, at Javnaðarflokkurin tekur Tjóðveldi við í samgonguna.
Orsøkin til, at fyrrverandi javnaðarformaðurin hesaferð hevur valt Tjóðveldi er, at sonur hansara, Erling Eidesgaard, var uppstillaður fyri Tjóðveldi.
– Hóast eg hvørja einastu ferð í eina hálva øld havi valt ein og sama flokk, so geri eg nú tað undantak, at eg velji sonin framum, gjørdi Jóannes Eidesgaard kunnugt á Facebook.
Hevði Jóannes Eidesgaard hildið seg til sín egna flokk – ja so hevði tað verið Páll á Reynatúgvu sum hevði fingið síðsta varasessin hjá Tjóðveldinum – um altso Tjóðveldi verður við í nýggju samgonguni.
Soleiðis fullu atkvøðurnar á tjóðveldislistanum til løgtingsvalið hósdagin. Tjóðveldi fekk seks tingfólk. Fara trý teirra í landsstýrið, so koma trý tey næstu á ting, Eirikur í Jákupsstovu, Liljan Weihe og Erling Eidesgaard:
1 Høgni Hoydal 760
2 Bjørt Samuelsen 759
3 Sirið Stenberg 457
4 Hervør Pálsdóttir 376
5 Annika Olsen 335
6 Dennis Holm 305
7 Eirikur í Jákupsstovu 295
8 Liljan Weihe 290
9 Erling Eidesgaard 216
10 Páll á Reynatúgvu 215
11 Sigrid Jensdóttir Dalsgaard 201
12 Anfinn í Toft 191
13 Annita á Fríðriksmørk 168
14 Óluva Klettskarð 157
15 Magni Arge 146
16 Høgni í Stórustovu 134
17 Jóhan Christiansen 126
18 Rógvi Nybo 93
19 Ásla Leila B. Johansen 88
20 Ingolf Sólheim Olsen 88
21 Jens Ivan í Gerðinum 71
22 Gudny Vang 64
23 Ronnie Thomassen 64
24 Kristian Oskar Henriksen 61
25 Fróði Bjarkason Skúvadal 58
26 Jógvan Jón Henriksen 43
27 Jón Kragesteen 43
28 Pól Jóhannus Toftegaard Larsen 37
29 Trina Eysturoy 36
30 Christian Guttorm Mathisen 29
31 Jensina Olsen 26
