Luis Moreno Ocampo, sum er høvuðsákæri við altjóða krígsbrotsmannadómstólin ICC, sigur nú, at talan var møguliga um eitt krígsbrotsverk, tá fyrrverandi libyski einaræðisharrin Muammar Gaddafi doyði.
Gaddafi varð tikin og doyði tann 23. oktober undir rættiliga ógreiðum umstøðum, og Luis Moreno Ocampo sigur, at krígsbrotsmannadómstólurin kennir seg ikki heilt vísan í, at skiftisstjórnin í Libya fer at kanna øll brotsverk undir uppreistrinum.
-Deyða Gaddafis er eitt av teimum málunum, sum greiði skal fáast á. Vit mugu fáa at vita, hvat hendi, tí tað er ein álvarssamur illgruni um, at tað var eitt krígsbrotsverk, sigur ákærin.
ST hevur gjørt av at senda eina kanningarnevnd til Libya at kanna ymsar tilburðir undir uppreistrinum, og Luis Moreno Campo ætlar sær at tosa við limir í ST-trygdarráðnum um, hvørji prógv tey hava í málinum um Muammar Gaddafi.
Said al-Islam, sonur Muammar Gaddafi, situr í varðhaldi í Libya. ICC hevur biðið um at fáa hann útflýggjaðan til rættarsókn, men higartil hevur libyska skiftisstjórnin sagt, at hann skal fyri rættin í Libya.
