Danskir myndugleikar hava tikið avgerð um at steingja fyri allari flogferðslu úr Stórabretlandi til Danmarkar í 48 tímar.
Tað kunnaði danski heilsumálaráðharrin, Magnus Heunicke, á Twitter.
– Danmark letur aftur loftrúmið fyri øllum flogførum úr Stórabretlandi mánadagin 21/12 frá kl. 10 og 48 tímar frameftir. Hetta hendir fyri at forða fyri, at nýggja muteraða virusið spjaðir seg her heima, skrivaði Magnus Heunicke um midnáttarleitið í gjár.
Danmark er ikki einasta land í Evropa, ið avmarkar ferðsluna úr Stórabretlandi, og millum annað Holland og Frakland hava tikið somu amboð í verk. Frakland er eisini farin eitt stig longri og hevur avmarkað allari ferðslu tvørtur um Ermasund inn í Frakland. Kortini ber til at ferðast úr Fraklandi til Stórabretlands.
Tað var fyrradagin, at boðað varð frá, at ein nýggjur variantur av koronuvirus var staðfestur í Stórabretlandi, og hóast nýggi varianturin ikki er deyðiligari enn teir, ið vit kenna frammanundan, verður sambært fleiri bretskum miðlum mett, at nýggi varianturin smittar upp til 70 prosent betri.
