Ukrainsk skúlabørn eru byrjað sítt næsta skúlaár, síðan russiski forsetin, Vladimir Putin, leyp á grannalandið.
- Lærararnir gera sítt besta, men fyri mong børn er skúladagurin merktur av, at tey javnan noyðast at rýma niður í bumburúmini - ella halda seg heima.
Sambært ST hava russisk loftálop higartil oyðilagt 1300 skúlar í Ukraina, og tískil hava skúlabørn partvís fingið undirvísing á jarnbreytarstøðum.
Men, á fyrsta skúladegi eftir summarfrítíðina var ein lítil ljósglæma at hóma í krígsherjaða Kherson-fylkinum har suðuri í Ukraina.
Hendan dagin komu 11 børn heimaftur til síni kæru eftir ólógliga at hava verið burturflutt av russiska hersetingarvaldinum í landinum.
Yngsta barnið var bara tvey ár og hitt elsta 16. Børnini í skúlaaldri kundu byrja aftur í skúla í sínum egna umhvørvi, haðani tey vórðu burturflutt.
Hond verður nú tikin um nøkur av børnunum á barnaheimi í økinum, og fimm børn eru sloppin heimaftur til sín sjálvs.
Norska kringvarpið NRK veit at siga, at fleiri hava verið partur av arbeiðnum at fáa børnini heimaftur, eitt nú felagsskapurin, Save Ukraine.
Russisku myndugleikarnir siga seg hava "bjargað" í hundraðtúsundatali av børnum úr krígsherjaðum økjum síðan innrásina hin 24. februar í fjør.
Russland verður lagt undir at hava burturflutt nógv ukrainsk børn, og nú verður landið kannað á altjóða stigi fyri ólógliga burturflyting.
