Í 2008 stóð Heri Schwartz Jacobsen undir brúsuni hjá foreldrunum, og mamman kendi seg noydda at minna hann á, at hann ikki skuldi taka sær so góðar stundir undir brúsuni, tí tað var ov kostnaðarmikið í olju.
- Tað var undir brúsuni, at hugskotið kom til mín. Eg orðaði tað við pápa mín, sum man eisini kann siga vera ein uppfinnara. Nakað av tíð eftir, stóð ein hitavekslari í kjallaranum hjá foreldrunum, sum brúkar tað frammanundan heita spillvatni at hita nýggja vatni upp við. Sami hitavekslarin stendur enn í kjallaranum og virkar ótrúliga væl, sigur Heri.
Les eisini: Hitavekslarin skal gera heimin til eitt betri stað
Síðani tók Heri hugskotið við sær til Danmarkar, har hann las á DTU og hitti Boga Bech Jensen. Nú hava teir patent upp á hitavekslaran, umframt at hava stovnað fyritøkuna Defined Energy, har Heri Schwartz Jacobsen sjálvur er tekniskur stjóri. Tað vísti seg nevniliga, at hitavekslarin var ólíkur øðrum av sama slag, umframt at vera nógv effektivari.
- Vit gjørdu onkrar royndir í gjár, og úrslitini hava verið ótrúliga góð. Um vit samanbera við aðrar hitavekslarar, so hava teir flestu tað til felags, at teir fáa trupulleikar av feitti og skitti, sum setir seg fast í rørum. Tann, sum vit hava sett upp í Tórshavn hevur nú koyrt í seks vikur uttan trupulleikar, sigur Heri.
Les eisini: Sparir 27.000 litrar av olju árliga
Góðu úrslitini merkja eisini, at fyritøkan hyggur útum landoddarnar, umframt, at teir eisini merkja stóran áhuga aðrastaðni frá.
- Ja, vit hava merkt stóran áhuga allastaðni frá, men vit fara varligani fram, og royna okkum fyrst og fremst í Danmark, har vit hava sett sølustjóra og merkt ítøkiligan áhuga frá trimum donskum kommunum.
Trýst á pílin undir myndini og hoyr um framtíðarætlanirnar hjá fyritøkuni
