Bretska politiið hevur handtikið ein 14 ára gamlan drong og eina 16 ára gamla gentu, sum eru undir illgruna fyri at hava fyrireikað yvirgang.
Tey bæði blivu handtikin í Manchester um páskahalguna, men eru leyslatin aftur ímóti borgan og skulu rokna við at verða avhoyrd aftur í næsta mánaði.
Samstundis hevur politiið avhoyringar av seks fólkum, sum langafríggjadag blivu handtikin í enska havnarbýnum Dover, veit AP-tíðindastovan at siga.
Fyrr í páskavikuni blivu níggju bretskir borgarar, sum allir hoyra til somu familju, handtiknir í Turkalandi, tá teir royndu at sleppa um markið til Sýria.
Illgruni er um, at hesir níggju bretsku borgararnir ætlaðu at sleppa til Sýria fyri har at fara upp í part við yvirgangsherinum Islamskum Stati.
