Jørgen Thygesen, ella Berner-maðurin, sum hann eisini verður nevndur, byrjaði hjá Berner í Danmark sum sølumaður í 1980. Tvey ár seinni kom hann til Føroyar fyrstu ferð og vitjaði bil- og maskinverkstaðir kring landið. Hetta gjørdi hann tvær ferðir um árið fyrstu árini, til hann búsettist í Føroyum í 1992.
Tað sum hann selur mest av til bil- og masikverkstaðir eru brúksting sum t.d. skrúvur, skivur, borir, sagir og aðra útgerð umframt el- og hondamboð. Berner er ein altjóða fyritøka, sum varð stovnað í Künzelsau í Týsklandi av Albert Berner í 1957, og er framvegis ein familjufyritøka.
Í 1994 stovnar Jørgen Thygesen heilsøluna Sp/f DAFA, har hann umboðar ymiskar danskar fyritøkur við klædnavørum, stivlum og skóm. Hann hevur sostatt koyrt kring landið sum ferðandi sølumaður fyri bæði Berner og Dafa.
Eftir at hava búð fast í Føroyum í 17 ár, hevur Jørgen nú gjørt av at flyta aftur til Danmarkar at búgva. Tann 1. desember yvirtók Geir Wardum í Havn heilsøluna Dafa, og Jørgen hevur sagt upp hjá Berner til 1. januar eftir næstan 30 ár í starvi. Síðst í januar flyta hann og konan Oda, sum er føroysk, til Danmarkar at búgva. Tey hava keypt hús í Fredericia. Tey hava tó ikki slept Føroyum endaliga. Jørgen hevur enn umboð fyri onkrar skógvar og stivlar, sum hann framvegis kemur at selja her.
