Tað er okkurt, ið bendir á, at B36 skal hava nýggjan venjara til komandi kappingarár. Sum skilst, so heldur Eyðun Klakstein ikki fram sum venjari, eftir tvey ár í sessinum.
- Í løtuni hava vit fult fokus á at fáa so góðan enda sum gjørligt uppá kappingarárið. Tað er ov tíðliga at tosa um næsta ár, sigur Eyðun Klakstein, ið er í harðari kapping við HB um fjórða plássið, ið gevur pláss í Evropa League.
Í seinastuni hevur ljóðað, at Oddbjørn Joensen, sum vann FM við HB í 2013, og Jákup á Borg skulu standa á odda fyri liðnum komandi kappingarár. Oddbjørn Joensen er ikki í venjarastarvið í løtuni, meðan Jákup á Borg er givin sum spælari, men tekur A-venjaraprógv hjá fótbóltssambandinum.
- Tað kenni eg einki til. Eg havi ikki hoyrt nakað frá nøkrum felagi, og havi heldur ikki tosað við nakran. Skuldi eg fingið eitt venjaratilboð, so hyggi eg at tí, men tað skal geva meining, um eg skal taka av, sigur Oddbjørn Joensen.
Fyrr í ár hevur ljóðað, at felagið hevur hugt seg fyri uttanlands eftir venjara. Enn er alt tó bara gitingar.
