Spanskir myndugleikar koma nú við ávaringum um ógvusligan hita teir næstu dagarnar.
Í dag nærkaðist hitin í nøkrum sponskum býum teimum 43 stigunum.
The Guardian veit at siga, at sponsku myndugleikarnir heita á fólk um at halda seg innandura heitastu tíðina á degnum.
Heitt verður eisini á fólk um at drekka ríkiligar nøgdir av vatni og ikki at drekka alkohol.
Tað er heit luft úr Norðurafrika, sum er orsøkin til hitabylgjuna, og tað er serliga í útsynningspartinum av Spania og í miðøkinum, at hitin er ógvusligur.
Væntandi er, at hitabylgjan, sum er yvir pørtum av Spania, í øllum førum verður til mikudagin í hesi vikuni.
Ávaringar eru um hita upp ímóti 43 stigum í eitt nú Sevilla, Cordoba og Badajoz, og í høvuðsstaðnum Madrid kunnu hitastigini koma upp í 38 stig.
