Eirikur Lindenskov
Sjónvarp Føroya skal spara eina millión krónur. Hetta førdi í gjár til, at eini 10 fólk vórðu søgd úr starvi í Sjónvarpi Føroya.
Tað hevur leingi verið kent, at sjónvarpið hevur verið í fíggjarligum trupulleikum.
Í 1998 hevði sjónvarpið eitt rakstrarhall upp á 2,4 millónir krónur, og í fjør restaðu 1,6 milliónir krónur í til lønir.
Slapp ikki at
taka rakstrarlán
Fyri at loysa henda trupulleika ætlaði sjónvarpið at taka eitt rakstrarlán, men leiðslan fekk at vita frá undirvísingar- og mentamálastýrinum, at hetta hevði sjónvarpið ikki heimild til.
Tá sjónvarpið heldur ikki fekk játtaða eina eykajáttan á løgtingsfíggjarlógini, vóru góð ráð dýr.
Signar á Brúnni, landsstýrismaður í mentamálum fekk kortini útvegað pengarnar onkursvegna, og tískil hóraði sjónvarpið víðari.
Men nú er aftur galið, og fyri at spara eina millión, verða tí starvsfólk søgd úr starvi.
20% av starvsfólkunum søgd úr starvi
Í Sjónvarpi Føroya starvast 52 fólk, so talan er um hópuppsagnir.
Verður talan um 10 starvsfólk, so verða um 20% av starvsfólkunum í Sjónvarpi Føroya søgd úr starvi.
Tróndur Djurhuus, sjónvarpsstjóri vil ikki gera viðmerkingar til málið enn, men úr sjónvarpinum verður váttað, at tey eru í ferð við at gera broytingar í sjónvarpinum, sum tey málbera seg.
Sosialurin skilir kortini, at nøvn eru sett á uppsøgnirnar - og á middegi í gjár høvdu onkur teirra fingið tað at vita.
Sum Sosialurin skilir støðuna, verður ikki talan um at leggja niður ávíst virksemi hjá stovninum, men fólk verða søgd upp á ymsu deildunum.
