- Eg veit væl, at tað kanska ljóðar eitt sindur løgið, men okkara tilbúgving hevur einki við kaving at gera sum so. Tann parturin av bjarging í sambandi við ólukkur, liggur eitt sindur leysur, men tað er so ikki okkara skylda, sigur Kartni Jacobsen.
Hava útgerð
Kartni Jacobsen sigur, at hóast sløkkiliðið ikki hevur skyldu til at kava eftir fólki, so verður tað gjørt, men um nakað skuldi hent, so kann sløkkiliðið ikki lastast fyri tað, tí tað er ikki teirra ábyrgd.
- Vit hava fólk, ið hava kavaraútbúgving. Vit hava altíð nøkur kavarasett standandi klár, um tørvur er á tí, og tað kemur so at siga ikki fyri, at ikki onkur froskmaður er á vaktarlistanum, sigur brandmeistarin.
Um so er, at eingin froskmaður er á vakt hjá sløkkiliðnum, ger tað fyri so vítt heldur einki, tá ið tað ikki er ábyrgdin hjá sløkkiliðnum at kava eftir fólki, sum eru í neyð.
Brandmeistarin sigur, at fólkið hjá teimum er væl útbúgvið, og at um so er, at fólk er í neyð, so kava teir sjálvsagt eftir teimum.
Ábyrgdin kostar
Tað er ivaleyst tað mest náttúrliga, at sløkkiliðini fáa ábyrgd av hava tilbúgving av froskmonnum, men hetta kostar pengar.
Kartni Jacobsen sigur, at skal sløkkiliðið í Havn hava ábyrgdina, so krevur tað pengar til meiri útbúgving, útgerð og annað.
Sambært Kartna Jacobsen er útgerðin hjá sløkkiliðnum í lagi, hóast tað eftir bjargingina av einum bili av havsins botni á havnarvág leygardagin ljóðaði, at hon als ikki var tað.
- Útgerðin hjá okkum er í lagi, tað er eingin ivi um tað. Onkur av froskmonnunum hjá okkum dámar kanska betur sína egnu útgerð, og teir eru kanska ikki so vanir við okkara útgerð. Men okkara útgerð er í lagi, sigur brandmeistarin.
Somuleiðis sigur Kartni Jacobsen, at froskmenninir av og á hava felagsvenjingar, hóast tær kanska ikki eru so nógvar í tali.
- Vit hava fleiri smáar uppgávur, ið virka sum eitt slag av venjingum fyri froskmenninar hjá okkum. Um vit hyggja burt frá teimum, so hava vit helst einar tvær fyriskipaðar venjingar árliga, sigur Kartni Jacobsen.
