Trý føroyingalið vóru í leiki í næstbestu donsku fótbóltsdeildini í kvøld. Harímillum var ein føroyingauppgerð.
Tann stóra søgan í næstbestu donsku fótbóltsdeildini er, at Martin Agnarsson og liðfelagarnir í Aarhus Fremad flongdu gamla stórliðið, AaB.
Martin spældi allan dystin, tá Aarhus Fremad á Riiskoven leikvøllinum í Aarhus vann stórsigur 5-1 á AaB. Í steðginum var heimaliðið á odda 4-0. Aarhus Fremad skoraði tey fýra málini upp á 16 minuttir. Erik Nissen legði fyri, Martin Kubel økti til 2-0, Magnus Kaastrup til 3-0, og Marcus de Claville til 4-0. Miðskeiðis í seinna hálvleiki skoraði Martin Kubel aftur fyri Aarhus Fremad. Í 77. minutti megnaði AaB loksins at skjóta eitt mál, ið munaði lítið í samlaða roknskapinum.
HER ber til frá Viasat at síggja hæddarpunktini frá 5-1 sigrinum hjá Aarhus Fremad.
Aarhus Fremad er nummar sjey í deildini við níggju stigum fyri átta dystir.
Meinhard E. Olsen var við frá dystarbyrjan hjá Kolding, og Poul Kallsberg og Adrian R. Justinussen vóru við frá dystarbyrjan hjá Hillerød, tá føroyingauppgerð var á skránni á Autocentralen leikvøllinum í Kolding.
Dysturin endaði sum hann byrjaði, nevnliga við javnleiki 0-0. Poul var skiftur út í 62. minutti. Meinhard og Adrian fingu fulla spælitíð.
Kolding er næstfremst í deildini við 14 stigum fyri átta dystir. Hillerød er nummar trý við sama stigatali, men við verri málúrtøku. Liðið hjá Sebastian Pingel, AC Horsens er fremst í deildini við 15 stigum.
Martin, Meinhard, Poul og Adrian fara nú at hugsavna seg um EM-undankappingardystirnar: Føroyar-Kroatia á heimavølli komandi fríggjakvøld klokkan 19.45, og Gibraltar-Føroyar á útivølli, mánakvøldið 8. september klokkan 19.45.
