Tað skuldu ganga sjey umfør áðrenn uppflytaraliðið, Wisla Plock tapti fyrsta dystin í bestu pólsku fótbóltsdeildini hetta kappingarárið.
Andrias Edmundsson spældi allan dystin, tá Wisla Plock á útivølli tapti 0-1 fyri Arka Gdynia. Wisla Plock hevði fleiri málmøguleikar enn heimaliðið, men tað var heimaliðið sum dugdi at taka av, og so máttu Andrias og liðfelagarnir av vøllinum fyri fyrstu ferð hetta kappingarári uttan nakað stig. Heimaliðið skoraði sigursmálið tíðliga í seinna hálvleiki.
Andrias fær karakterin 7,2 frá Soccerstand, og var tann leikarin hjá Wisla Plock, ið fekk næstbesta karakterin.
Wisla Plock er framvegis fremst í deildini við 16 stigum fyri sjey dystir. Gornik Zabrze hevur 12 stig á øðrum plássinum, men hevur spælt ein dyst færri enn Wisla Plock.
Andrias fer nú at hugsavna seg um HM-undankappingardystirnar móti Kroatia á Tórsvølli komandi fríggjakvøld klokkan 19.45, og útidystin móti Gibraltar, mánakvøldið 8. september klokkan 19.45.
