- Eg eri ikki samdur við løgmanni í, at vit skulu fáa flóttafólk til Føroya. Tað sigur Rodmundur Nielsen, tinglimur fyri Fólkaflokkin. Og hann leggur afturat, at tað í hesum sambandi tosar hann fyri allan fólkaflokkin.
Í kjaksending á Rás2 staðfesti Rodmundur Nielsen, at ístaðin fyri at fáa flóttafólk til Føroya, eiga vit at seta meiri pening av á fíggjarlógini til neyðhjálp, so at vit fáa hjálpt fólki, har tey eru. Sjálvur var Rodmundur Nielsen nakað síðani í eini flóttafólkalegu í Turkalandi við 17.000 flóttafólkum. - Tey eru takksom fyri at vera so tætt við sítt heimland og at hjálpin kann veitast har, sigur hann. - Tað, sum stendur sterkast eftir, aftan á vitjanina í leguni, er gleðin hjá flóttafólkunum fyri at fáa skjóta hjálp so tætt við markið til heimlandið, sum í hesum føri var Sýria, sigur Rodmundur Nielsen. - Vit fáa nógv meiri fyri pengarnar við at hjálpa flóttafólkum, har tey eru, enn vit fáa við at taka flóttafólk til Føroya. - Teirra ynski er at sleppa heimaftur sum skjótast, legði hann afturat.
Tingmaðurin fyri Fólkaflokkin sigur, at í hesi legunu í Turkalandi, høvdu tey skúlar, sjúkrahús, mosku, og har vóru enntá serligir handlar fyri at ganga matvanunum hjá teimum ymsu flóttafólkunum á møti.
Rodmundur Nielsen heldur, at brúka vit pengarnar á staðnum, røkkur hann 10 ferðir longur enn hann hevði rokkið, skuldu vit tikið flóttafólk higar. - Skulu vit vísa okkara góða vilja í verki, eigur landsstýrið at ganga á odda og játta meiri pening til neyðhjálp – og at brúka peningin úti í heimi, har neyðin er størst, leggur hann afturat. Hann heldur, at tað er ein betri máti at veit hjálp, heldur enn at lata alt drukna í berari vælvild hjá teimum, sum vilja hava flóttafólk til Føroya.
Meiri verður á in.fo seinni um føroyingar og flóttafólk
|
