Vinnupolitikkurin í Føroyum er ov tilvildarligur og óstøðugur. Tað var ein av niðurstøðunum hjá Føroya Arbeiðsgevarafelag á aðalfundinum í dag
- Vinnupolitikkurin er farin fyri bakka, og hetta er partvíst orsakað av vánaliga samstarvinum millum fleiri av aðalráðunum, sum hava spjatt vinnumálini millum sín, sigur Føroya Arbeiðsgevarafelag, sum beinleiðis mælir til, at aðalráð verða løgd niðurløgd og at vinnumál verða savnað undir eitt av teimum.
Føroya Arbeiðagevarafelag undrast eisini á politiska atgerðaloysi, nú bygnarligt hall er á fíggjarlógini. Úrslitið verður, at vinnulívið, sum skal standa fyri einum komandi búskaparvøkstri, skal gjalda fyri ovurnýtsluna í almenna sektorinum, sigur felagið, sum heldur, at hendan tilgongd bara fer at longja um búskaparkreppuna, sum framman undan rakar hart.
felagið heldur í hesum sambandi, at málið um atgongd til arbeiðsmegi sum heild má endurskoðast og at spurningurin millum Føroyar og ES verður tikin í álvara.
Eisini mælir felagið til, at nýggjur fiskivinnupolitikkur verður orðaður. Grundsjónarmiðið hjá Føroya Arbeiðsgevarafelag er, at okkurt er galið við eini vinnu, sum ikki kastar mest møguligt av sær fíggjarliga.
- Endamálið við einum fiskivinnupolitikki má vera at skipa eina vinnu, sum er lívfrøðiliga burðardygg og búskaparliga haldfør og sum gagnnýtir tilfeingið á ein hátt, sum kastar mest møguligt av sær til bæði vinnuvirkir og samfelagið yvirhøvur, sigur Føroya Arbeiðsgevarafelag.
