- Sambandsflokkurin fer ikki at góðtaka, at latin verða rullandi loyvi og óavmarkaður ognarrættur og ræðisrættur til vinnuna.
Tað sigur Kaj Leo Holm Johannesen, formaður Sambandsfloksins, nú flokkurin hevur landsfund í morgun.
Hann ásannar, at broytingar eiga at verða gjørdar í fiskivinnuni
Eitt nú eigur fiskivinnuskipanin at byggja á grundregluna um at reka fiskivinnuna eftir marknaðartreytum, uttan rakstrarstuðul, og við støði í altjóða góðkendum reglum um burðadyggan fiskiskap.
- Grundarlagið skal vera tann umsitingarætlan, sum er gjørd og sum skal fylgjast, soleiðis, at vit fáa eina burðardygga stovnsrøkt og harvið størri úrtøku og inntøkur úr okkara fiskastovnum.
- Allur fiskur eigur at landast um føroyskan kaikant fyri at skapa lønandi arbeiðspláss í vinnuni.
Fiskiríkidømið er ogn Føroya fólks, men ein brúksrættur kann verða latin fyri eitt ávíst tíðarskeið, soleiðis at vinnan hevur tryggar karmar til íløgur og rakstur eitt áramál inn í framtíðina.
- Sambandsflokkurin fer ikki at góðtaka, at latin verða rullandi loyvi og óavmarkaður ognar- og ræðisrættur til vinnuna. Ræðisrætturin til føroyska tilfeingið skal verða á føroyskum hondum og ikki á útlendskum hondum.
Kaj Leo Holm Johannesen sigur, at Sambandsflokkurin fer heldur ikki at góðtaka, at bankarnir fáa veð í veiðuloyvum – hetta svarar til eina avhandan av ognar- og ræðisrættinum til bankarnar.
Hann sigur, at landsstýrið roynir enn at fáa allar flokkar at semjast um eina fiskivinnunýskipan. Men hann sigur, at í løtuni er ringt at meta um, antin tað fer at eydnast ella ikki.
